Një makinë me 45 kilogramë kanabis u ndalua nga policia kufitare në Qafë-Bot të Sarandës, rreth orës 08:30 të mëngjesit të sotëm, ndërsa dy persona ranë në pranga.
Automjet Benz-Mercedes, me targë AA 314 PR po kalonte në pikën kufitare për të dalë nga Shqipëria, dhe nga kontrolli i ushtruar në vijën e dytë nga shërbimet e Policisë Kufitare në makinë u gjet lënda narkotike.
Kanabisi ishte fshehur në bagazhin e këtij automjeti, në pjesën e sarbatorit, futur nën një llamarinë të salduar posaçërisht për fshehjen e saj, e ndarë në 39 pako të mbështjella me natriban dhe plastikë, e cila u sekuestrua nga policia në cilësinë e provës materiale.
Policia arrestoi shoferin Miri Hamata 28 vjeç dhe pasagjerin Vilson Lamka 30 vjeç. Ata akuzohen për veprën penale “Trafikimi i narkotikëve”.
