“Zgjedhjet e 6 marsit mbartin farën e shpresës, janë sinjali i një ndryshimi të madh”, u shpreh nga Dibra, ish-kryeministri Sali Berisha, i cili në mbëshetetje të kandidatit Premtim Kryemadhi, po takohet me banorët e Maqellarës.
Berisha tha se me 6 mars shqiptarët, atje ku ka zgjedhje të pjesshme vendore, duhet të tregojnë se me votën e tyre mbështesin opozitën e vërtetë, kandidatët e “Shtëpisë së Lirisë”, duke rikthyer shpresën te familjet shqiptare.
Duke iu drejtuar të pranishmëve, Berisha i pyeti se çfarë mbështetjeje keni marrë ju nga Qeveria?
“Nuk ka qeveri që nuk mbështet, subvencionon dhe financon fermerët, por këtu mbështetja është zero, dhe sot kemi fermerë që po falimentojnë, ndërsa të rinjtë e angazhuar në punërat e bujqësisë po largohen. Kjo qeveri e ka mendjen vetëm te plaçkitja, ndërsa ndaj jush po aplikon një politikë kriminale”, tha Berisha.
Ish-Kryeministri tha se për 3 inceneratorë janë dhënë 420 mln euro, por asnjëri nuk punon. “Çfarë ka ndodhur? Me thes kanë vjedhur. Po kush? Këta qeveritarë me firmën e Kryeministrin, i cili është gardiani i mbrojtjes së parave publike”, tha Berisha.
Ai u shpreh se SPAK po tenton të mbyllë çështjen, dhe sikur të mos mjaftonte kjo, ngritën një Komision Hetimor, për ti vënë kapakun aferës së inceneratorëve.
“Nëse kjo qeveri do të kishte investuar 420 mln euro në kanalet vaditëse, të gjitha kanalet vaditëse do të ishin ndërtuar nga e para”, tha Berisha. Në vijim ai u shpreh se fermerët sot paguajnë të gjitha imputet bujqësore, plehrat kimike, 3 herë më shtrenjtë se në 2013.
“Fermerët po therin lopët sepse dengu i barit është dyfishuar në çmim, ndërsa çmimi i qumështit ka rënë. Ky është krim që po ndodh”, tha Berisha.
