Ish-Kryeministri Sali Berisha u ka bërë thirrje qytetarëve në të gjithë vendin, kudo që ata do të votojnë më 6 Mars, “të mos harrojnë se çdo votë tek logoja e rrëmbyer e PD-së është votë e humbur për Partinë Demokratike dhe opozitën e vërtetë dhe çdo votë për kandidatët e “Shtëpisë së Lirisë” është votë për opozitën e vërtetë.
Gjatë një vizite në një fasoneri në qytetin e Durrësit, që prodhon dhe eksporton këpucë, Berisha shpjegoi situatën në të cilën janë vënë demokratët në këto momente prej bashkëpunimit të Lulzim Bashës me kreun e qeverisë Edi Ramën.
“Shiko ç’kanë bërë, për herë të parë në 30 vite shpiket pseudo-opozita. Këtë nuk e bëri Ramiz Alia në vitin 1990. Jo! Nuk e bëri! U themeluam, e pa që s’kishte mundësi tjetër dhe e pranoi.
Kurse Edi Rama arriti të krijojë opozitën e tij falso me Lul Bravën dhe me policë dhe me gjykatës të tij, t’i japë logon e PD-së! T’I japë logon e PD-së në ëmnyrë që njerëzit të mashtrohen ditën e votimit dhe të mendojnë se po votojnë për Partinë Demokratike, kur në fakt ata votojnë për “kallpin” e opozitës, për Lulzim Bravën!
Ndaj dhe thirrja ime për çdo qytetar në Durrës dhe kudo që votohet është që të mos harrojnë se çdo votë tek logoja e rrëmbyer e PD-së është votë e humbur për Partinë Demokratike dhe opozitën e vërtetë dhe çdo votë për kandidatët e Shtëpisë së Lirisë është votë për opozitën e vërtetë, është votë për ndryshimin.
Ne kemi nevojë jetike të kemi një opozitë të vërtetë, se vetëm me opozitë të vërtetë ne mund të përballojmë dhe përmbysim këtë qeveri, më e keqja e 30 viteve”, tha Berisha.
Gjatë bashkëbisedimit, Berisha sqaroi edhe arsyen e aktivizimit të tij edhe më fuqishëm në PD se më parë. “ U riktheva për t’u sjellë ju në piedestal. Se të rinjtë do të vendosim ne”, tha ai dhe shtoi:
“Prandaj i kemi shumë të rëndësishme këto zgjedhje. E vërteta është se Foltorja solli shpresë. Mirëpo konkretizimi i suksesit në këto zgjedhje është mesazhi më i fuqishëm i shpresës që ne dërgojmë kudo në Shqipëri, veçanërisht te të rinjtë, e presin me padurim një mesazh të tillë dhe unë kam besim të plotë se do t’ia dalin. Është një klimë shumë pozitive, ju e shihni.
Ju e dini që rëndojnë shpirtra njerëzish mbi firmën e Sakos. Sako që përfaqëson Gjushin, ka vendosur firma në dokumente, që kanë shkaktuar më vonë drama të mëdha njerëzore të tërmetit. Është autore, është kryeinspektore e dramave të tërmetit të shtatorit, të cilat shërbyen apo ishin një bazë e dramës së madhe që krijoi tërmeti i nëntorit. Me firmën e saj. Ajo ka firmën, ajo s’duhet të kishte kandiduar kurrë. Ndërgjegjja njerëzore s’mund ta lejonte. Pse dha pasardhësja e Gjushit, dorëheqjen?! Se nuk pranoi të firmoste dokumentin e saj”, tha Berisha.
Ish-Kryeministri sulmoi edhe kandidatin e caktuar nga Lulzim Basha për Bashkinë e Durrësit, Luan Hoti. Berisha e quajti atë shoku monopol, referuar faktit se ai ka monopolin e shërbimeve në portet shqiptare, nga Saranda në Shëngjin.
“Kandidati tjetër është shoku Monopol apo mister Monopoli. Që të gjendet demokrat, opozitar, të fitojë monopolin e shërbimeve nga Saranda në Shëngjin, kjo ndodh vetëm me luan kandidatin e Lul Bravës. Ndaj dhe thirrja për demokratët: Të bashkohemi që të gjithë, të bashkohemi pa përjashtim, të votojmë kandidatin tonë.
Logoja që ka rrëmbyer Lul Basha me Edi Ramën është thjesht maskë e pseudo-pluralizmit dhe e marrëveshjeve të tyre. Ndaj dhe të votohet vetëm logoja e “Shtëpisë së Lirisë” dhe kandidati ynë Ardi Muka.
Kjo është një thirrje për të gjithë demokratët: të mos votojnë monopolin! Monopoli është korrupsion, është korrupsion, është korrupsion, është i ndaluar me ligje. Kjo është e vërteta!”, tha Berisha.
