Pas një sezoni të shkëlqyer në Holandë, ku veshi fanellën e Vitesse, Armando Broja po tregon të gjitha cilësitë e tij edhe në Premier League. Sulmuesi shqiptar në pronësi të Chelsea-t, i lindur në vitin 2001, është një nga lojtarët më të spiktatur te Southampton.
Me tetë gola dhe një asist në të gjitha garat ai ka tërhequr vëmendjen e disa klubeve angleze, mbi të gjitha Arsenalit. Blutë, megjithatë, po monitorojnë nga afër progresin e sulmuesit shqiptar për të marrë një vendim që nuk do t’i bënte ata të pendoheshin në të ardhmen.
Sipas asaj që raporton Daily Express çdo vendim për të ardhmen e Brojës do të merret vetëm gjatë verës. Thomas Tuchel i ka kërkuar klubit të mos ndërmarrë asnjë veprim për të ardhmen e Brojës përpara verës. Ai dëshiron që ta shohë nga afër njëherë talentin shqiptar dhe më pas do të vendosë për ta mbajtur te Chelsea apo për të shtrënguar duart në drejtime të ndryshme.
