Sot është zhvilluar seanca gjyqësore për ish gjyqtaren e Krujës, Enkelejda Hoxha, e cila prej muajsh ndodhet e arrestuar dhe po pritet të merret vendimi përfundimtar lidhur me dënimin apo lirimin e saj.
Gjatës seancës, avokati mbrojtës i ish gjyqtares, ka kërkuar pafajësi për klienten e tij, duke thënë se ajo ishte e pafajshme.
Enkelejda Hoxha nga ana tjetër ka deklaruar se hetimi ndaj saj dhe më pas arrestimi që i kanë bërë, ishte një sulm politik që po i bëhej.
Ndërsa Prokuroria në kundërpërgjigjie ka deklaruar se diçka e tillë nuk qëndronte pasi hetimet kishin nisur pas disa përgjimeve ku shfaqej ish gjyqtarja dhe anëtarë të një grupi kriminal.
Hoxha u vu në pranga paraditen e 11 shkurtit të vitit 2021 bashkë me 9 persona të tjerë, në kuadër të një operacioni të mirëorganizuar nga SPAK, pasi ishte vënë në përgjim prej muajsh. Pikërisht më 11 shkurt, Hoxha, me skemën e përgatitur me ndihmën e bashkëpunëtorëve të saj, do të lironte të dënuarin për vrasje, Saimir Petani.
Gjyqtarja Enkelejda Hoxha akuzohet se ka marrë shuma nga 6 mijë deri në 12 mijë euro në këmbim të lirimit të të dënuarve për vrasje.
