Izet Haxhia është dënuar me 21 vite burgim këtë të Premte nga Gjykata e Tiranës për vrasjen e Azem Hajdarit.
Gjykata e shpalli fajtor Haxhinë për veprën penale “Vrasje me paramendim” e kryer në bashkëpunim dhe vendosi që vuajtja e dënimit të kryhet në një burg të sigurisë së zakonshme.
Sipas organit të akuzës, i pandehuri ka pasur rol kryesor në vrasjen e ish-deputetit demokrat Azem Hajdari, me 12 shtator 1998, pak metra larg selisë së Partisë Demokratike.
Në pretencën e saj, prokuroria kërkoi 25 vite burgim për Izet Haxhinë.
Ky i fundit e ka mohuar që ai të ketë rol në vrasjen e ish-deputetit të Partisë Demokratike Azem Hajdari.
Në vitin 2006, Izet Haxhia u arrestua në Turqi, pasi u shpall në kërkim ndërkombëtar. Ekstradimi i tij zgjati për vite të tëra dhe Haxhia mbërriti në Shqipëri pas 12 vitesh. Haxhia u ekstradua në maj 2018, pasi Gjykata e Krimeve të Rënda pranoi kërkesën për rigjykimin e tij, duke rrëzuar dënimin e mëparshëm nga gjykata.
