Ka përfunduar takimi i kryeministrit Edi Rama me banorët e “5 Majit” në Tiranë, ku duket se palët nuk janë dakordësuar.
Rama u shpreh se asnjë nga banorët nuk do të mbetet në rrugë, do të marrin bonus qiraje deri në momentin e përfundimit të projektit.
“Kemi pasur një bisedë intensive, dhe faktikisht unë kam sqaruar atë që ka qenë e vërteta që ditën e parë. Këtu e kam të vështirë që të flasim, se ka devijime të personave që kanë interesat e tyre. Për të gjithë banorët, qoftë të zonës së 5 majit, që janë të ndarë në dy kategori, do të ketë një trajtim të dinjitetshëm, solidarë, njësoj siç u bë me aa që u prekën nga tërmeti. Ata që janë me dokumenta të rregullta, zgjidhja është e qartë, ose kompesim financiar, ose me shkëmbim”, tha Rama në një prononcim për gazetarët pas takimit.
“Për ata që janë pa letra fare, qasja është solidare, nuk është hedhja në rrugë, ja shpjegova të gjitha procedurat, që do të thotë se shtëpia pa leje prishet, familja merr kompensimin me shtëpi, njësoj si ata që mbetën pa shtëpi nga tërmeti, dhe që në atë ditë që do marrin shtëpinë, do trajtohen me bonus qeraje”, shtoi ai.
Ndërkohë nënë Liza, një nga 3 protestueset që u takuan me Ramën, tha se nuk kanë marrë asnjë garanci nga Kryeministri.
“Nuk na dha asnjë garanci, unë kërkova që shteti të më kompensojë aq metra katror sa kisha në banesën që mu shemb. E kisha vilë, nuk kërkova vilë, nuk kërkova as më shumë, por nuk pranoj as më pak kompensim. Isha në proces legalizimi dhe Kryeministri nuk na dha asnjë garanci”, tha nënë Liza.
