Nga Albi Serani
Një pjesë e gjyqtarëve dhe prokurorëve janë shkarkuar gjatë procesit të Vetingut, pasi trupat e rivlerësimit kanë konstatuar se ata nuk kalonin testin e integritetit dhe kishin kontakte me persona të inkriminuar.
Por, kontrollorët e tyre, pra 12 komisionerët e Vetingut nuk kanë kaluar në filtrat e Drejtorisë së Sigurimit të Informacionit të Klasifikuar (DSIK), një strukturë e cila verifikon personalitetin dhe lidhjet e mundshme të zyrtarëve me persona të krimit të organizuar.
Ky informacion jepet zyrtarisht nga DSIK, e cila konfirmon për “Boldnews.al” se nuk ka hartuar raporte vlerësimi për anëtarët e Komisionit të Pavarur të Kualifikimit dhe Komisionerët Publikë.
Redaksia po publikon një cikël mbi individët që kryejnë procesin e rivlerësimit të gjyqtarëve dhe prokurorëve në Shqipëri.
Parlamenti pritet të miratojë këtë të Enjte (dt.10 Shkurt 2022) zgjatjen e mandatit të anëtarëve të Komisionit të Pavarur të Kualifikimit me të paktën 2 vjet e gjysëm, ndërkohë që ndaj pjesës më të madhe të tyre ekzistojnë dyshime mbi kriterin e pasurisë.
Nga ana tjetër, ata kanë marrë detyrën e më tej synojnë zgjatjen e mandatit, pa kaluar në testin e integritetit.
Drejtoria e Sigurimit të Informacionit të Klasifikuar (DSIK) pranon se nuk ka kryer verifikime mbi 12 anëtarët e Komisionit të Pavarur të Kualifikimit dhe 2 Komisionerët Publikë.
Në përgjigje të një kërkese të “Boldnews.al”, DSIK deklaron se “nuk janë hartuar raporte verifikimi për subjektet e cituara në kërkesën tuaj, pasi nuk janë subjekte në kuadër të ligjit 84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë”.
Në Korrik të vitit 2007, Kuvendi i Shqipërisë zgjodhi anëtarët e trupave të Vetingut. Ata ishin verifikuar paraprakisht nga Avokati i Popullit, komisionet përkatëse parlamentare, si edhe nga Operacioni Ndërkombëtar të Monitorimit.
Këto mekanizma rezultuan skarco dhe kjo u provua nga problemet penale që kanë tashmë dy prej gjyqtarëve të Kolegjit të Posaçëm të Apelimit (KPA), Luan Daci dhe Ardian Hajdari.
Por, ndërkohë, strukturat që kryen vlerësimin e njëpasnjëshëm të kandidatëve, përfshirë edhe ata që u përzgjodhën si komisionerë Vetingu, nuk i janë nënshkruar testit të integritetit.
Gjatë pesë viteve të fundit, komisionerët e KPK-së, Komisionerët Publikë dhe anëtarët e KPA-së kanë pasur akses të plotë në të dhënat e agjencive ligjzbatuese dhe të shërbimeve inteligjente.
Në shumë vendime për gjyqtarë e prokurorë shënohet se trupat e Vetingut kanë lexuar, shqyrtuar, vlerësuar e rivlerësuar të dhëna inteligjente.
Pra, është e qartë se ata janë pajisur me certifikata sigurie, një dokument që lëshohet nga Drejtoria e Sigurimit të Informacionit të Klasifikuar dhe i lejon që të lexojnë të dhëna që shumë pak sy mund t’i shohin në Shqipëri.
Procesi i pajisjes me çertifikatë sigurie kalon në disa filtra dhe kërkon një angazhim deri në tre muaj verifikime, para se një zyrtar i posaçëm të pajisjet me dokumentin.
Kjo do të thotë që DSIK, në bashkëpunim me institucionet e tjera, kryen kontrolle të imtësishme dhe harton raportet përkatëse të verifikimit, para se të bindet që një person të ketë akses në informacione inteligjente.
Por, në rastin e komisionerëve të Vetingut, siç rezulton zyrtarisht, DSIK nuk ka hartuar raporte për verifikimin e figurës së tyre, pra, nuk ka kryer kontrolle për figurën e tyre, pasi, sipas përgjigjes zyrtare, ata nuk janë pjesë e procesit të rivlerësimit.
