“Tërmet” tek Ajax. Marc Overmars dha dorëheqjen nga posti i drejtorit teknik të kampionëve holandezë, pasi pranoi se kishte dërguar mesazhe të papërshtatshme për disa kolege femra në klub.
Overmars, ish-futbollist i Ajax, Arsenal, Barcelona dhe Holanda ishte një nga anësorët më të fortë në vitet 90-të. Ai nënvizoi se “nuk e kuptoi se po kalonte kufirin, e kuptoi këtë gjë vetëm ditët e fundit”.
48-vjeçari Overmars filloi punë si drejtor teknik tek Ajax një dekadë më parë. Kryetari i bordit mbikëqyrës të Ajax, Leen Meijaard, u shpreh shumë i ashpër në komentin e tij, duke thënë: “Është shkatërruese për këdo që është dashur të përballet me këtë sjellje”.
Klubi gjigant holandez bëri këtë njoftim për shtyp, me këtë rast: “Overmars e mori këtë vendim pas diskutimeve të ditëve të fundit. Një sërë mesazhesh të papërshtatshme dërguar disa kolegeve femra për një periudhë të gjatë kohore qëndrojnë në themel të vendimit të tij për t’u larguar nga klubi”.
Vetë Overmars sqaroi: “Më vjen turp. Javën e kaluar u përballa me raporte për sjelljen time. Fatkeqësisht nuk e kuptova që po e kaloja kufirin me këtë, por kjo m’u bë e qartë ditëve të fundit. Papritmas ndjeva një presion të madh, kërkoj falje. Sigurisht, për dikë në pozicionin tim, kjo sjellje është e papranueshme.
Tani e kuptoj gabimin, por është tepër vonë. Nuk shoh asnjë mundësi tjetër përveç largimit nga Ajax. Kjo situatë ka ndikim të madh edhe në jetën time private. Prandaj iu kërkoj të gjithëve të më lënë mua dhe familjen time vetëm”.
