Një ditë pasi Apeli i GJKKO vendosi dënimin e Saimir Tahirit me 3.4 vite burg, Monika Kryemadhi, kryetare e LSI, në një intervistë për Oranews, u shpreh se “pse nuk arrestohen Erion Veliaj, Alqi Bllako dhe Armando Subashi kanë firmë tek afera inceneratorëve?”
“Ok, zoti Tahiri kishte disa telefonata që e implikonin me Habilajt. Po zoti Erion Veliaj i cili ka firmë, firmë në shkresë për inceneratorin e Tiranës.
Zoti Alqi Bllako i cili ka firmë në shkresë për inceneratorin e Fierit, Tiranës dhe Elbasanit.
Zoti Armando Subashi i cili ka shkresë, ka letër, ka vendime, ka fakte të kryera me firmën dhe vulën e tyre për inceneratorin e Fierit”, tha Kryemadhi.
Kryetarja e LSI e konsideroi më herët dënimin e Tahirit si të orkestruar nga Edi Rama.
“E gjithë filozofia e këtij procesi vjen si rezultat i një shpërngulje në kohë të opinionit publik, kostove politike. Ne e dimë të gjithë që zoti Tahiri nuk ishte gjë tjetër veçse një nga oficerët e fushës së zotit Rama. Të gjithë ne e dimë që koka e të gjithë situatës jo vetëm të kanabizimit por dhe të gjithë gjërave të tjera është një situatë që ka vetëm emrin e Edi Ramës”, tha Kryemadhi.
