Komisioni Qendror i Zgjedhjeve i është drejtuar me një shkresë zyrtare bashkisë së Durrësit ku kërkon informacione nga kryetarja në detyrë, Emirjona Sako, e cila garon në zgjedhjet e pjesshme të 6 marsit për postin e Kryebashkiakes, lidhur me shpërndarjen e fondeve të rindërtimit për qëllime elektorale.
Kërkesa drejtuar Sakos nga KQZ erdhi pasi më parë, LSI denoncoi fenomenin duke pretenduar se Bashkia e Durrësit ka miratuar vendime për shpërndarjen e fondeve të rindërtimit për banesat e dëmtuara në prag të zgjedhjeve të pjesshme lokale, për qëllime elektorale.
Në denoncim thuhet se bashkia ka miratuar vendime për miratimin e listave për 526 familje që përfitojnë nga programi i procesit të rindërtimit, për ndërtesat e dëmtuara nga fatkeqësia natyrore e tërmetit të datës 26 nëntor 2019 që variojnë nga 100-500 mijë lek. Këto fonde janë përdorur për qëllime elektorale të zgjedhjeve të pjesshme për Kryetar Bashkie të datës 6 mars 2022.
KQZ vendos afat tre ditë për marrjen e informacionit nga momenti i vënies në dijeni me shkresën.
