Është bërë e mundur dhe arrestimi i personit të tretë mbrëmjen e djeshme që u shpall në kërkim pasi ishte i përfshirë në trafikun e kokainës.
Vetëm një ditë i ka zgjatur arratia Armond Kurtit, i cili i shpëtoi dje arrestimit të policisë gjatë operacionit “January” ku u sekuestruan 1 kg kokainë.
Policia njofton sot se ka arrestuar 41¬vjecarin, i cili punon tek Drejtoria e Transportit Rrugor, mbrëmjen e djeshme në afërsi të Shkollës së Kuqe. Dy ditë më parë Gjergji Gjinaj, 49 vjeç dhe Ismail Allushi, 53, u arrestuan në flagrancë me 1 kg kokainë. Sipas policisë, operacioni u zhvillua në Rrugën “Vllaznit Huta”, ku u konstatua automjeti tip Fiat “500”, me drejtues mjeti Gjergji Gjinan rreth 10 metra më larg u konstatua i parkuar automjeti tip Audi, me drejtues shtetasin Armond Kurtin, i cili kontrollonte lëvizjet e personave dhe automjeteve në këtë rrugë,” bëri me dije dje policia në njoftimin e saj. Menjëherë u bë ndërhyrja nga ana e shërbimeve dhe kapja e Gjinës por në momentin e ndërhyrjes arriti të largohej me shpejtësi me automjetin e tij shtetasi Kurti. Nga kontrolli i ushtruar në automjetin tip Fiat është konstatuar një sasi me lëndë të dyshuar narkotike të llojt “Kokaine”, e cila rezultoi me peshë 978 gramë.
