Policia ka arrestuar mëngjesin e sotëm në vijim të operacionit ‘Stojani’ 28-vjeçarin Erjul Menga, i cili ishte shpallur në kërkim dhe i dënuar me 5 vite burg për kultivim dhe trafik kanabisi.
Kujtojmë se në vitin 2020, në kuadër të këtij operacioni janë vënë në pranga edhe tre persona të tjerë të cilët akuzohen për veprat penale “Kultivimi i bimëve narkotike” dhe “Prodhim dhe shitja e narkotikëve” në bashkëpunim.
“Në vijim të operacionit policor të koduar ‘Stojani’, për kapjen e autorit të katërt të shpallur në kërkim në kuadër të këtij operacioni, mbi bazën e informacioneve të grumbulluara në rrugë policore për vendodhjen e tij, shërbimet e Komisariatit të Policisë Mat në bashkëpunim me shërbimet e Policisë Fushë-Krujë, kanë organizuar punën dhe si rezultat gjatë orëve të para të mëngjesit të sotëm është bërë kapja dhe ndalimi i shtetasit: E. M., 28 vjeç, banues në Fushë-Krujë. Gjykata e Shkallës së Parë Mat, këtë shtetas e ka dënuar me 5 vjet burg, për veprat penale ‘Kultivimi i bimëve narkotike’ dhe ‘Prodhim e shitje e lëndëve narkotike’, i cili në bashkëpunim me 3 shtetas të tjerë të arrestuar më parë janë kapur në flagrancë duke punuar në një parcelë të cilët kishin mbjellë bimë narkotike”, njoftoi policia.
