Kryeministri i Kosovës, Isa Mustafa thotë se dialogu mes Kosovës dhe Serbisë do të zhvillohet me takime më të shpeshta. Mustafa tha se takimi i radhës do të mbahet në fillim të muajit shkurt.
Dy vendet kanë hyrë në një fazë të re të dialogut, atë të përfaqësimit në nivelin më të lartë, president – kryeministër.
Takimi i parë i këtij niveli është mbajtur të martën në Bruksel me ndërmjetësim të BE-së.
Mustafa ka thënë për televizionin publik se nga takimet e ardhshme do të shihet nëse Serbia është e interesuar për normalizim të vërtetë të marrëdhënieve, ashtu siç i janë zotuar përfaqësueses për Politikë të Jashtme të BE-së.
