Prej orës 08:00 të mëngjesit të sotëm dhe deri në orën 17:00, anëtarët e PD në Bashkitë Shkodër, Dibër, Durrës, Lushnje, Vorë dhe Rrogozhinë do të votojnë në primaret për të zgjedhur kandidatin për kryebashkiak në zgjedhjet e pjesshme të 6 marsit.
Emri që do të rezultojë më i votuari nga anëtarësia do të kandidohet për Kryebashkiak nga Komisioni i Rithemelimit, ndërsa pritet që ai të ketë mbështetjen edhe të shumë prej partive aleate. Shkodra dhe Rrogozhina kanë numrin më të lartë të kandidatëve në garën e primareve, përkatësisht 6 dhe 5 emra, ndërsa Durrësi dhe Vora kanë nga dy kandidatë, njëri prej të cilëve, pritet të shpallet edhe fituesi i garës së brendshme.
Një ditë më parë, Komisioni i Organizimit dhe Kontrollit të Operacioneve Elektorale fton të gjithë anëtarët e PD në degët Dibër, Durrës, Lushnje, Rrogozhinë, Shkodër e Vorë, të bëhen pjesë e procesit të votimit në primare, si ushtrim i demokracisë së drejtpërdrejtë, si proces përbashkues, për një Parti Demokratike më të fortë, më të hapur e më të bashkuar.
Sistemi i primareve është një risi për politikën shqiptare. Në statutin e miratuar nga delegatët e PD në Kuvendin e 11 dhjetorit u vendosën primaret në mënyrë që kandidatët për kryetarë bashkie dhe deputetë, të votohen nga anëtarësia.
Dibër
Behar Dema, ekonomist
Dafina Muda, psikologe
Premtim Riza Kryemadhi, arsimtar
Durrës
Ardian Muka, inxhinier urbanist
Silvja Gjepali, IT
Lushnje
Arben Zaimi, jurist-avokat
Elton Bano, jurist-avokat
Eurion Iljazi, arsimtar
Indrit Qerimi, arsimtar
Rrogozhinë
Eqerem Deliu, ekonomist
Hajrulla Tafa, arsimtar
Hekuran Xhani, mjek veteriner
Sokol Gosa, arsimtar
Vladimir Manushi, mjek dentist
Shkodër
Alfred Koçobashi, jurist
Arben Maliqi, jurist
Astrit Bushati, jurist
Bardh Spahia, mjek
Irena Shestani Shala, ekonomiste
Irma Kopliku, pedagoge matematike
Vorë
Luan Beta, inxhinier
Lulzim Vrana, ekonomist
