Një i ri është vënë në pranga nga policia e Gjirokastrës për veprat penale “Prodhim dhe shitje e narkotikëve” dhe “Përvetësim i titullit apo i detyrës shtetërore”.
Sipas bluve, pas ndalimit nga policia, ai është prezantuar si efektiv i forcave komando duke u treguar një dokument të falsifikuar.
Gjatë kontrollit fizik, 29-vjeçarit i janë gjetur doza me kanabis.
Aksioni
“Seksioni për Hetimin e Trafiqeve të Paligjshme dhe Narkotikëve, në bashkëpunim me Seksionin Operacional dhe Sektorin e Policisë Rrugore në DVP Gjirokastër, në bazë të informaçioneve të siguruara në rrugë policore se shtetasi E.K. ushtronte veprimtarinë kriminale të shpërndarjes së lëndëve narkotike në doza, finalizuan operaçionin e koduar ‘Transporter 2’, si rezultat i të çilit u arrestua në flagrancë shtetasi E.K., 29 vjeç, banues në Tiranë”, njoftoi policia.
“Në aksin rrugor Kakavije-Gjirokastër, në afërsi të fshatit Derviçian, gjatë kontrollit fizik të ushtruar nga shërbimet e Policisë, këtij shtetasi iu gjetën doza me lëndë të dyshuar narkotike kanabis sativa, gati për shpërndarje. Në momentin e ndalimit, shtetasi E.K. është prezantuar si efektiv i Forcave Komando Tiranë, por pas verifikimeve të kryera rezultoi se ky shtetas nuk është pjesë e këtyre Forcave”, shtuan të njëjtat burime.
Në cilësinë e provës materiale u sekuestruan lënda e dyshuar narkotike kanabis, 1 dokument identifikimi i Forcave Komando, 1 automjet dhe 1 aparat celular.
