Një i riu është arrestuar nga policia e Gjirokastrës pasi në makinën me të cilën lëvizte është gjetur një sasi kanabisi.
M.G., 29 vjeç, banues në Gjirokastër u arrestua në kuadër të operacionit të koduar “Transporter”, që erdhi në bazë të informacioneve të siguruara në rrugë policore, konfirmuan burime zyrtare nga blutë.
Në kërkim u shpall dhe një tjetër person.
“Në aksin rrugor Kakavije-Gjirokastër, në vendin e quajtur ‘Kthesa e Sofratikës’, gjatë kontrollit të ushtruar në automjetin tip “Toyota Yaris”, me drejtues shtetasin M.G., u gjetën 27. 6 kg lëndë e dyshuar narkotike cannabis sativa. Në përfundim të veprimeve të para hetimore, specialistët e Seksionit për Hetimin e Narkotikëve dhe Trafiqeve të Paligjshme bënë shpalljen në kërkim të shtetasit K.M., 28 vjeç, banues në Gjirokastër, i dyshuar si bashkëpunëtor”, njoftoi më tej policia.
Në cilësinë e provës materiale u sekuestrua lënda e dyshuar narkotike, automjeti dhe tre aparate celulare.
“Materialet në ngarkim të shtetasve të mësipërm i kaluan Prokurorisë pranë Gjykatës së Shkallës së Parë Gjirokastër, për veprën penale ‘Prodhimi dhe shitja e narkotikëve’ e kryer në bashkëpunim”, mbyllet njoftimi i policisë.
