Asambleja e Shoqatës Rajonale të Tiranës është mbyllur sot mes kontestimeve, ndërsa ka prodhuar një rezultat të parë i cili më pas duhet certifikuar nga gjykata. Rezultati i Asamblesë së sotme nuk ishte vetëm për presidentin e saj, por edhe delegatët me të drejtë vote në zgjedhjet e Asamblesë të FSHF-së.
FSHF ka bërë të ditur se në Sekretariat kishin mbërritur 6 kandidatura për 5 vendet vakante, pasi vendi i 6 i takon në bazë të statutit presidentit, në këtë rast, Krenar Alimehmetit.
Në përfundim të votimit, emrat që kanë dalë fitues dhe përfaqësues me të drejtë vote në Asamblenë Zgjedhore të FSHF-së në fakt nuk janë të panjohur. Kështu, një prej tyre është drejtori sportiv i Dinamos, Arbër Laçi, ndërsa tjetri është trajneri Marko Pelinxhi, prej vitesh pjesë e klubit të Partizanit në akademinë e tij.
Gjithashtu, delegati i FSHF-së Fatjon Muhameti është zgjedhur mes 5 emrave. ashtu si drejtuesi i Internacional, Ervin Canollari dhe pedagogu i Universitetit të Sporteve, Florian Mema. Tani mbetet të shihet nëse këto votime do të cilësohen të rregullta nga gjykata dhe nëse ata do të shkojnë si votues në Asamblenë e 2 marsit të FSHF-së./Panoramasport
