Disa qytetarë kanë tentuar që të bllokojnë rrugën në Morinë këtë të Hënë, duke kundërshtuar masat anti-Covid të vendosura nga Kosova në kufi. Qytetarët kërkojnë heqjen e masave kufizuese pasi tashmë për tu futur në Kosovë duhen tre doza të vaksinës kundër Covid-19, ose dy doza dhe një test negativ PCR.
“Herën e parë me një vaksinë, herën e dytë me dy, herën e tretë me tre. Ndërkohë që vaksina e tretë bëhet gjashtë muaj. Ka afat kohor 6 mujor,” shprehet një qytetar i revoltuar.
Prezencë e shtuar e forcave policore ndodhen në vendin ku po zhvillohet protesta. Efektivët tentojnë të negociojnë me qytetarët që kanë bllokuar rrugën.
Të shumta kanë qenë reagimet pasi Kosova njoftoi masat e reja anti-covid nga qytetarë shqiptarë, por edhe nga shtete fqinje si Maqedonia e Veriut e cila kërkoi heqjen e masave shtrënguese.
