Derbi i shqiptarëve në “Olimpiko” u mbyll në paqe dhe pa fitues. Berat Gjimshiti nga njëra anë dhe Elseid Hysaj dhe Thomas Strakosha nga ana tjetër ndanë nga një pikë.
Lacio-Atalanta u mbyll në barazim 0-0, pavarësisht pritshmërive dhe parashikimeve të tifozëve për një ndeshje me shumë gola, nisur nga stili i lojës së dy skuadrave.
Nga Lacio, Strakosha dhe Hysaj u aktivizuan që në fillim të ndeshjes, i pari në portë, ndërsa Hysaj në pozicionin natyral, atë të mbrojtësit të krahut të djathtë. Shkodrani u zëvendësua nga trajneri Sarri në minutën e 69.
Përballë tyre ishte Berat Gjimshiti, që luajti të gjitha minutat si mbrojtës në krahun e djathtë në prapavijën me tre të tillë të vendosur nga trajneri Gasperini.
Barazimi pak u shërbeu të dyja skuadrave, me Atalantën që mban vendin e katërt me 43 pikë dhe Lacion të gjashtin me 36 pikë.
