Komiteti Ekzekutiv i FSHF-së ka vendosur që data e Asamblesë Zgjedhore të jetë e mërkura e 2 Marsit. Gjatë këtyre javëve do të përcaktohen delegatët e klubeve dhe shoqatave rajonale që do të marrin pjesë në zgjedhjet e këtij institucioni dhe ata më pas do të votojnë për strukturat drejtuese të tij.
Në Asamblenë e këtij viti do të ketë zgjedhjet për president dhe anëtarët e Komitetit Ekzekutiv të FSHF-së, si dhe mund të ketë ndryshime statutore sic ndodh zakonisht. Kandidatët për president në zgjedhje deri më tani janë presidenti aktual, Armand Duka i cili kërkon mandatin e 6, si dhe gazetari Dritan Shakohoxha.
“Federata Shqiptare e Futbollit bën me dije se Komiteti Ekzekutiv i FSHF-së në mbledhjen e tij të datës 21.01.2022 në bazë të kompetencave që i jep Statuti i FSHF-së, vendosi të thërrasë Asamblenë e Përgjithshme të Zakonshme Zgjedhore, që do të zhvillojë punimet më datë 02.03.2022, ora 10:00 në selinë e FSHF te ‘Shtëpia e Futbollit’ në Tiranë. Në këtë mbledhje anëtarët e Komitetit të Ekzekutiv të FSHF përcaktuan dhe miratuan edhe rendin e ditës së punimeve të Asamblesë”, thuhet në njoftimin e FSHF.
