Gjykata e Apelit në L’Aquila ka dënuar sot me burgim të përjetshëm Roland Bushin, muratorin shqiptar 30 vjeç, të akuzuar se ka vrarë Aliona Oleiniç, moldave 33 vjeçe.
Bushi e goditi 11 herë me thikë moldaven në Francavilla al Mare më 3 shtator 2019, raportojnë mediat e huaja.
Gruaja, e cila punonte në një klub nate që frekuentonte Bushi, vdiq në spitalin Gemelli në Romë 45 ditë pas shtrimit, pas gjashtë operacioneve.
I akuzuari për vrasje me dashje u dënua me burgim të përjetshëm nga Gjykata e Assize e Chieti-t.
Bushi, i cili qëndroi me viktimën pasi e masakroi me thikë në atë kohë, ka përsëritur edhe sot pendimin e tij. Në gjyqin e shkallës së parë ai pretendoi se Aliona ishte e dashura e tij dhe se atë mëngjes, kishte konsumuar drogë dhe alkool, dhe donte vetëm ta kërcënonte, por jo ta vriste.
