Barcelona ka një muaj që bën llogari dhe me sa duket do t’i ofrojë Lionel Mesit kontratën që ai ëndërronte, me parametra financiarë si askush tjetër në botë dhe me klauzola nga më të ndryshmet, të cilat e vendosin yllin argjentinas në një nivel mbi të tjerët.
Me pak fjalë, Barcelona i “premton Kinën”, por në Europë. Sipas “Ok Diario”, Fillimisht Mesit i ishin ofruar 30 milionë euro në vit me 5 milionë euro në formë bonusesh, por klubi në fund e kuptoi që kjo ofertë duhej rritur dhe tashëm ka arritur shifrën 40 milionë euro neto në vit.
Kuptohet që kjo shumë thuajse dyfishohet duke llogaritur taksat që duhet të paguajnë katalanasit. Por përfitimet e Mesit nuk mbyllen me kaq. Klubi është gati të dëmshpërblejë lojtarin në rast të gjobave nga autoritetet financiare spanjolle në të ardhmen, duke parashikuar se mund të ketë të tilla. Njëkohësisht, nuk do të mbetet pa u shpërblyer edhe babai i tij.
Në momentin e firmës, ai do të përfitojë një shifër prej 50 milionë eurosh, si “kuotë besnikërie”. Në këtë mënyrë, do të kalohet edhe në këtë aspekt braziliani Neimar, babai i të cilit kishte përfituar një shifër të përafërt pasi lojtari firmosi me klubin katalanas, një detaj i cili u zbulua më vonë dhe nga filluan të buronin pakënaqësitë e Mesit me drejtuesit e Barcelonës.