Kryeministri Edi Rama ka reaguar sot ndaj ultimatumit të Presidentit turk, Rexhep Tajip Erdogan, i cili në sallën e Parlamentit, gjatë një fjalimi, kërkoi hapur që gulenistët në Shqipëri duhet të luftoheshin nga autoritetet shqiptare.
Madje, Erdogan kushtëzoi rifillimin e punimeve për përfundimin e Xhamisë së Namazgjasë me goditjen e kësaj lëvizjeje nga qeveria shqiptare.
“Shpresoj që kur të vij herën tjetër këtu, këto probleme të jenë zgjidhur”, tha Erdogan në Parlamentin e Shqipërisë.
Ai tha se do të kthehej në Shqipëri në fund të muajit të Shenjtë të Ramazanit dhe se qeveria shqiptare duhet të “mbarojë punë” me Lëvizjen Gulen brenda shkurtit.
Duke iu përgjigjur pyetjeve të gazetarëve lidhur me ultimatumin e Erdogan, Rama tha se Shqipëria nuk i ka asnjë borxh Erdoganit dhe as Turqisë, ashtu siç edhe sipas tij as Turqia dhe as Erdogani nuk na kanë ndonjë borxh neve.
“Mes miqsh dhe vëllezërish nuk ka borxhe”, tha Rama.
Kryeministri, gjatë vizitës së Erdogan në Shqipëri, u shfaq i përulur, madje shfaqi një vasalitet të Shqipërisë ndaj Turqisë, sikundër pohoi disa herë se Erdoganin e ka një mik special.
