Markelijan Beqiri, 26 vjeç, është arrestuar nga policia e Tiranës pasi ishte shpallur në kërkim për plagosjen e një personi në një hotel në autostradën Durrës-Tiranë.
Policia njoftoi se i riu, banues lagjen nr.17/1, Durrës, u vu në pranga “bazuar në informacionet e marra në rrugë operative për një person të shpallur në kërkim për krime kundër personit, që qarkullonte me automjet në segmentin rrugor Linzë-Surrel”.
Gjykata e Shkallës së Parë Durrës i ka caktuar 26-vjeçarit masën e sigurisë “Arrest në burg”, si i dyshuar për kryerjen e veprave penale “Vrasja me dashje” mbetur në tentativë, “Moskallëzimi i krimit”, “Veprime që pengojnë zbulimin e së vërtetës” dhe “Armëmbajtja pa leje”.
Ai dyshohet se më datë 9 Dhjetor 021, në ambientet e një hoteli në autostradën Durrës-Tiranë, ka tentuar të vrasë me armë zjarri Arni Sulejmanin, i cili mbeti i plagosur. Menjëherë pas ngjarjes, Markelijan Beqiri është larguar nga vendi i ngjarjes.
