Pavarësisht asaj disfate në sekondat e fundit me Interin në Superkupë, Juventusi jep një tjetër sinjal të fortë. Fitorja me Udinesen në kampionat ishte e para ndërsa sot sërish impresionoi ndaj Sampdorias në Kupën e Italisë.
Bardhezinjtë nuk e diskutuan kualifikimin teksa avancuan më tej me goleadë, 4-1 që jep qetësi dhe më shumë entuziazëm djemve të Allegrit.
Cuadrado në 26’ hapi sfidën dhe më pas shënuan me radhë, Rugani në 52’, Dybala në 67’ dhe Morata në 77’ që zhvlerësuan golin e Conti në 63’.
Me këtë sukses, Juve siguron një vend në çerekfinale ku do të presë fituesin e çiftit Sassuolo-Cagliari.
