Nga Taulant Halili
Osmanëve apo turqve nuk iu dolën dot 500 vite për të nënshtruar e pushtuar Shqipërinë e shqiptarët, nuk iu mjaftuan mijëra ushtarë të vrarë në trojet shqiptare, nuk iu mjaftuan as qindra arka me florinj për të blerë tradhtarët, por iu deshën vetëm 45 milionë euro për të marrë pa luftë Shqipërinë, e ku sulltani i tyre të fliste para Kuvendit të Shqipërisë (Këtë se bëri dot as Viktor Emanueli, as Duçja e as Hitleri).
Nuk kishte skenë më të turpshme se sa të shihje ditën e sotme se si Sulltani Erdogan miku i Edi Ramës, të mitizohej në Kurbin, duke iu vendosur emri i tij në qendër të qytetit të Laçit.
Duke iu rikthyer historisë Kurbini ishte e vetmja zonë e Shqipërisë ku turqit nuk arritën dot ta pushtonin e as të korrnin qoftë dhe vetëm një fitore.
Hamzai do e kishte zili Ramën, Gjergj Kastrioti do e kishte kaluar në teh të shpatës, por fatkeqësisht sot kryeshqiptari vendosi që në ditën jubilarë të vendit atë të ndarjes nga jeta të heroit tonë kombëtar Gjergj Kastriotit, të na sillte e të na servirte si mikun më të madh të Shqipërisë vetë Sullatan Rexhep Taip Erdoganin, pasardhësin e pushtuesve turq.
Në 500 vite histori shqiptarët u dhunuan, poshtëruan e nuk iu la asnjë hapësirë nga perandoria osmane, por sot ne e harruam historinë, sepse Pashai Edi Rama, vendosi që Sulltan Erdogani të memorizohet në Shqipëri, duke i vendosur emrin në të vetmen zonë që turqit nuk e pushtuan asnjëherë.
E pra sot shqiptarët panë se si Hamzaji u rimishërua, e as më pak e as më shumë por tek njeriu që udhëheq vendin.
Që Shqipëria sot nuk ka luftë me asnjë shtet, këtë e dinë i madh e i vogël, por që vizitat e pushtuesve historikë të Shqipërisë të bëhen ditën e vdekjeve të heronjve kjo është skandaloze.
Erdogan ka ardhur e do vijë sërish në Shqipëri, por dita e sotme nuk mund dhe nuk duhej të pranonte një vizitë të tillë, për më tepër kur kjo duhet të ishte vetëm një ditë e të gjithë shqiptarëve, dita e bashkimit.
