Kryeparlamentarja Lindita Nikolli nuk ka mundur t´i shpëtojë elozheve ndaj Presidentit turk, Rexhep Tajip Erdogan, në ceremoninë që po zhvillohet në Laç, me rastin e dorëzimit të 522 banesave të rindërtuara me kontributin e qeverisë turke.
Nikolli, duke iu drejtuar Presidentit turk, tha se “ju sollët në Shqipëri një model të ri, punë ditë e natë, deri në përfundimin e këtij xhevairi në zemër të Laçit”.
“Kur në fund të dhjetorit ishim në Turqi në kuadrin e një vizite zyrtare nga Parlamenti shqiptar, u pritën nga Presidenti Erdogan, të cilit i shpreha mirënjohjen për ndihmën e madhe që na ka dhënë pas tërmetit të 26 nëntorit. Dhe Presidenti na tha fjalë zemre: kjo ishte gjëja që mund të bënte vëllai i madh në një situatë të vështirë”, tha Nikolla.
Në të gjithë fjalimin e saj, Nikolli u shfaq e përulur ndaj Presidentit Erdogan, i cili pas elozheve që ka dëgjuar në vizitën në Shqipëri mund ta ndjejë veten jo si vëllain e madh, por si Sulltan, ndërsa Shqipëria në sytë e tij nga zyrtarët më të lartë, u paraqit si vilajet. Dhe e gjitha kjo ndodhte në përjetorin e vdekjes së heroit kombëtar Gjergj Kastrioti Skënderbeu.
