Deputeti Agron Kapllanaj, i emëruar nga Lulzim Basha, si kryetar i degës së PD në Fier, u shpreh se në takimin që po mbahet në Teatrit Bylis janë demokratët e vërtetë.
“Cilin nga juve ka dërguar në këtë takim Edi Rama? Ju jeni demokratët e vërtetë”, iu drejtua Kapllanaj, duke shtuar se “ne duhet të ndahemi nga e shkuara”.
“Demokratët e viteve 90 kanë kontributin e tyre, u jemi mirënjohës se kanë kontribute më shumë, por sigurisht cikli i brezave do të vazhdojë, ashtu sikundër edhe unë do të largohem, por po rriten fëmijët dhe nipërit e mi, që janë rritur jo me frymën e urrjetjes”, tha Kapllanaj.
Duke iu drejtuar demokratëve që protestonin, Kapllanaj tha se “ato janë të detyruar, pasi Berisha mori në telefon ish-Kryetarin e PD në Fier dhe i tha që të nxirrte njerëzit në protestë. Por unë u them se ata e kanë derën e PD të hapur, demokratët nuk duan zhurmë, nuk duan sharje”.
Ai tha se Berisha ka qenë komunist, ish-sekretar partie i PPSH, ndaj dhe kultivoi frymën e sharjeve dhe zhurmës.
“Sali Berisha kur ishte sekretar partie nuk i linte studentët me flokë të gjata, apo të mbanin pantallona sipas modës. Armiku jonë është Edi Rama”, tha Kapllanaj, duke shtuar se “edhe të majtët e ndershëm e kanë derën e hapur në PD, ata mund të japin kontributin e tyre”.
