Presidenti i Turqisë, Recep Tayyip Erdogan, do të vizitojë Shqipërinë të hënën, më 17 janar, ditë që përkon me vdekjen e Gjergj Kastriot Skënderbeut, heroit kombëtar të shqiptarëve.
Erdogan pas ceremonisë së pritjes në aeroportin “Nënë Tereza” do të vizitojë një familje në Laç, qytet në të cilin, qeveria turke ka kontribuar për ndërtimin e disa banesave të shkatërruara nga tërmeti i vitit 2019.
Më pas, është parashikuar të dorëzohen shtëpitë e të ndërtuara për këto familje.
Në orën 13:00, do të mbahet një takim mes Erdogan dhe kryeministrit të Shqipërisë, Edi Rama.
Ndërsa në orën 15:00, do të ketë një konferencë për mediat, kjo pas nënshkrimit të disa marrëveshjeve mes dy palëve.
Erdogan do të marrë pjesë dhe në ceremonia e inaugurimit të xhamisë së Et’hem Beut në Tiranë, ndërsa siç është bërë publike, ai në orën 17:00 do të mbajë një fjalim përshëndetës në Kuvendin e Shqipërisë.
Ndërkohë, Policia e Shtetit ka njoftuar se për nevoja të sigurisë publike, aksi rrugor Milot-Vorë-Milot dhe rrugët hyrëse dhe dalëse në këtë aks rrugor, në datën 17 janar, nga ora 07:00 e mëngjesit deri në orën 14:00 të po kësaj date, do të jetë i bllokuar për lëvizjen e kamionëve.
Masat e marra nga Policia janë të ngjashme me ato që u aplikuan gjatë vizitës së Presidentit amerikan në Tiranë, George Bush, 15 vite më parë.
Policia bëri të ditur se do të ketë kufizime edhe për kategoritë e tjera të automjeteve rrugore, të cilat duhet të përdorin rrugë dytësore për të qarkulluar në këtë orar.
Po ashtu, Policia njoftoi se do të ndalohet lëvizja e mjeteve në itinerarin mbikalimi i Laçit- Laç, në datën 17.01.2022, nga ora 08:30 deri në orën 12:30 si dhe prej orës 08:30 të datës 17.01.2022 deri në orën 10:00 të po kësaj date, do të ketë ndalim qarkullimi për automjetet, në segmentin rrugor Rinas-Vorë-Rinas.
Kufizime të lëvizjes do të ketë dhe për bizneset që ushtrojnë aktivitetin në aksin rrugor Vorë-Milot-Vorë, si dhe bllokime të lëvizjes së automjeteve në disa segmente rrugore në Tiranë, në orare të ndryshme të datës 17.01.2022.
Policia e Shtetit ka marrë të gjitha masat për kufizimin e këtyre lëvizjeve dhe në këtë kuadër kërkon mirëkuptimin dhe ndihmën e përdoruesve të rrugës që gjatë kohës së kufizimit dhe ndalimit të lëvizjes të mos planifikojnë lëvizje në këto akse dhe të zbatojnë me rigorozitet udhëzimet e punonjësve të Policisë së Shtetit që do të jenë të planëzuar në shërbim në këto akse rrugore.
“Qytetarët që duan të udhëtojnë në drejtim të Rinasit, me qëllim udhëtimin jashtë shtetit, me avion, të marrin masa për të lëvizur para orës së bllokimit të lëvizjes së automjeteve”, apeloi Policia.
