Elsamed Burgaj është lojtari i radhës që i bashkohet Partizanit. Qendërmbrojtësi ishte pjesë e Dinamos, por së fundmi ka dalë në stërvitje me të kuqtë.
Burime të besueshme pranë futbollistit bëjnë me dije që 18-vjeçari ka kontratë me Dinamon deri në fund të sezonit.
“Blutë” nuk kanë pranuar t’i japin leje-kalimin për t’u larguar, megjithatë ai ka zgjedhur t’i bashkohet ekipit të kuq. Burgaj shihet si një nga futbollistët e prespektivës dhe është pjesë e Kombëtares U-19.
Shtatlarti pret zgjidhjen e kontratës me konsensus, megjithatë kjo duket e vështirë. Kësisoj është i vendosur të vijojë stërvitjen me të kuqtë deri në verë, atëherë kur ka mundësi “De Juro” të bëhet pjesë e Partizanit.
