Ish-Kryeministri Sali Berisha deklaroi sot se selia e PD-së do t´u kthehet demokratëve. Berisha tha se nuk ka forcë në Botë që të ndalë vendimin e Kuvendit Kombëtar të demokratëve.
“Nuk ka për të ndodhur kurrë që atje të ngrihen kullat sikundër po tenton Lulzim Brava dhe Edi Rama. E shikoni ju e kanë quajtur “projektin e 4 lirive”, jo po t´ja venë emrin George Soros. Unë ftoj demokratët e Shkodrës që ditën e dielë në orën 11:00 të vijnë në Pallatin e Sportit të qytetit, revolucioni vazhdon, nuk ka forcë që e ndal”, tha Berisha.
Ai shtoi se është gati të shkojë edhe para Gjykatës për të denoncuar çdo lidhje të Lulzim Bashës me krimin.
” E imagjinoni dot një politikan me lidhje të tilla me krimin? Çfarë tregojnë ato, çfarë premton kjo lidhje e politikës me krimin?”, tha Berisha.
Duke iu përgjigjur deklaratave të zv.Ndihmës Sekretarit amerikan të Shtetit, Gabriel Escobar, Berisha tha se çdo fakt apo provë që zotërojnë le ta sjellin t´ja paraqesin popullit shqiptar dhe unë do të marr vendimet e mia.
Berisha tha se do të vijojë takimet me qytetarët, ndërsa tha se do të organizohen protestat më të fuqishme në këtë vend kundër narko-qeverisë. Ai tha se gjithashtu do të organizohen tryeza ku do të diskutohen teza dhe çështje të ndryshme.
