Nga Taulant Halili
2022 supozohej të ishte viti i shpresës, integrimit, prosperitetit, por ‘JO’, edhe ky vit nisi si çdo vit tjetër gjatë periudhës rilindase, vrasje, shantazhe, kërcënime, frikë madje dhe tmerr.
Ndërkohë që 2021 mbyllej me drogë, 2022 nisi me vrasje, me tritol, me kanosje, me dhunë, sepse kjo është e vetmja strategji festive që rilindasit kanë vite që ju ofrojnë shqiptarëve, kjo edhe për faj të plotë të opozitës, e cila vijon edhe fle.
Në një vend normal opozita sot duhet të ishte në shesh, jo për të festuar, por për të protestuar, por në Shqipërinë e Lulit ‘JO’, sepse këtu opozitë bëhet vetëm kur na preket selia, madje edhe kur na preket roja, brava, kyçi e çelësi, por jo kur vriten njerëz, kur tmerrohen qytetarë, kur fëmijët kanë frikë të dalin.
Sot si kurrë ndonjëherë madje dhe në periudhën kur shqiptarët kacafyteshin me sistemin, nuk ka patur kaq shumë pasiguri, sepse në atë kohë e keqja dihej ishte diktatura dhe ata që e mbronin, por sot e keqja është gjithandej, kudo ku shkel, prek, flet, e madje edhe ku fle…
2022 supozohej të ishte viti ku fëmijët të gjenin ëndrrat, të rriturit punën, e të rinjtë të ardhmen, por jo, edhe këtë vit ende pa nisur mirë na e vodhën bandat, ata që na e vjedhin çdo vit, ata që na përbuzin, shkelin, e na dhunojnë ende pa dalë dielli…
Po na shkatërrojnë të ardhmen, ata që ne vetë i votuam, ata që ne i shohim e i duartrokasin në televizion, ata që sot ne u bëjmë lajme, ata që ne i quajmë politikanë nga të gjithë krahët.
E pra nuk ka kartolinë më të shëmtuar në botë se kjo që sot po shohim ne shqiptarët, ne që ende sot e 32 vite besojmë akoma në shprehjen “E duam Sqhipërinë si gjithë Europa”.
Një tmerr pa nisur ende viti, statistika të frikshme që edhe vendet që janë në luftë nuk i kanë parë, e pra sot më 4 Janar ne shqiptarët shohim se si vrasim njëri tjetrin e ndërkohë shteti fle, e opozita zihet se kush do marrë selinë…
E nëse ka Zot, sot ai (ajo) duhet të vërë dorën në zemër e të mendojë njeherë për këtë copë Shqipëri, e për këta mjeranë që ende shpresën e vetme e kanë tek perëndia…
