Në funksion të tensioneve të vazhdueshme rreth Ukrainës, presidenti amerikan Joe Biden planifikon të flasë sot personalisht në telefon me presidentin rus, Vladimir Putin, njoftoi Këshilli i Sigurisë Kombëtare i Shtëpisë së Bardhë.
Kjo bisedë do të shërbejë si konsultime paraprake, që do t’u hapin rrugën takimit të planifikuar për më 10 janar në Gjenevë mbi konfliktin ukrainas, i cili ka javë që po përshkallëzohet.
”Bisedimet ishin me kërkesë të Rusisë”, theksoi një zyrtar i lartë i administratës, duke shtuar se është në interesin e të dyja palëve të zhvillojnë bisedime të drejtpërdrejta për të shmangur përshkallëzimin në konflikt.
”Qeveria amerikane është në kontakt të ngushtë me aleatët dhe partnerët e saj evropianë për të koordinuar përgjigjen ndaj pranisë në rritje ushtarake ruse në kufirin ukrainas”, theksoi Shtëpia e Bardhë.
”Presidenti Biden ka folur tashmë personalisht për këtë çështje edhe me homologët e tij në Evropë”, shpjegoi më tej Këshilli i Sigurisë Kombëtare.
