Nga Boldnews.al
Një regjistër mbi 500 mijë targa automjetesh në pronësi të qytetarëve është publikuar gjatë kësaj fundjave, duke iu shtuar skandalit të të dhënave personale të siguruara nga “Patronazhistët” e Partisë Socialiste dhe “Listës së Pagave” të mbi 630 mijë shqiptarëve.
Situata është katostrofike për qeverinë “Rama”, e cila në rastin më të mirë është treguar tërësisht e paaftë për të ruajtur konfidencialitetin e të dhënave të shtetasve.
Por, dyshimet më të forta janë që lista me të dhëna personale janë hartuar nga zyrtarë të administratës, për t’ua vënë në dispozicion armatës së “Patronazhistëve”, e për t’i përdorur për presione apo joshje elektorale.
Kryeministri Edi Rama e kundërshtoi këtë dyshim.
Në një konferencë për media mesditën e së Enjtes, pak orë pasi në telefonat e mijëra qytetarëve po dërgohej lista e pagave të qindra mijëra personave, Rama orientoi hetimet e Prokurorisë drejt një “dore kriminale në Tatime”, duke mohuar me forcë se njerëz pranë tij janë përgjegjës për rrjedhjen e pagave të shqiptarëve.
Por, publikimi i listës së Targave, një e dhënë e cila nuk administrohet nga “një dorë kriminale në Tatime”, e rrëzoi menjëherë justifikimin banal të kryeministrit shqiptar.
Sistemi i Targave menaxhohet nga Drejtoria e Përgjithshme e Shërbimit të Transportit Rrugor.
Këto të dhëna, së bashku me gjeneralitetet e shqiptarëve dhe pagat e tyre, gjenden në një sistem të vetëm, “E-Albania”, të menaxhuar nga Agjencia Kombëtare e Shoqërisë së Informacionit (AKSHI).
Nga e njëjta bazë të dhënash rrodhën para zgjedhjeve parlamentare të 25 Prillit 2021 listat me gjeneralitetet e 900 mijë personave në Tiranë.
Këto emra u gjendën në duart e “Patronazhistëve”, një grup gjigand personash që punonin në errësirë për Partinë Socialiste.
Në atë kohë, Rama i mbrojti Patronazhistët, duke deklaruar se të dhënat që gjendeshin në sistemin e tyre partiak ishin siguruar nga kontaktet derë më derë me qytetarët.
Mijëra persona mohuan që të jenë kontaktuar nga militantë të Partisë Socialiste, megjithëse emrat dhe numrat e tyre të telefonit ishin të saktë në listën gjigande partiake.
Pas shpërthimit të skandalit të “Patronazhistëve”, nisi një hetim penal nga prokurorët e Strukturës së Posaçme Anti-Korrupsion (SPAK), e cila u dekorua me titullin “heronjtë e fëmijëve shqiptarë” nga ambasadorja amerikane në Tiranë, Yuri Kim.
Pas disa muajsh dhe pas një kërkese të rrëzuar në mënyrë të vazhdueshme për sekuestrimin e serverit të redaksisë së “Lapsi.al”, e cila e publikoi e para listën e Patronazhistëve, SPAK-u hoqi dorë nga hetimi, pa kryer asnjë veprim minimal mbi “Patronazhistët” apo institucionet që menaxhojnë të dhënat e qytetarëve.
Pasi SPAK-u mbylli sytë për atë skandal, të tjera rrjedhje bombarduan publikun, fillimisht me Pagat e më tej me Targat.
Janë të dhëna, të cilat gjenden të gjitha të grupuara në “E-Albanian” e AKSHI-t. Drejtoresha e këtij institucioni, Mirlinda Karçanaj, garantoi në krah të kryeministrit Rama se “të dhënat e shqiptarëve janë të sigurta”.
Një shprehje, e cila ashtu si deklarimi i Ramës për “një dorë kriminale në Tatime”, duket se nuk bind as militantët më të verbër të “Rilindjes”.
