Gjykata e Lartë ka rrëzuar rekursin e ish-ministrit të Mbrojtjes, Fatmir Mediu, lidhur me dosjen “Gërdeci”.
Mediu ishte kundër rigjykimit për dosjen “Gërdeci”. Mbrojtësit e Mediut pretenduan se vendimi cënonte parimin e çështjes së gjykuar njëherë më parë, sa kohë që një kërkesë për rigjykim është rrëzuar më herët nga Gjykata e Tiranës dhe Apeli.
Gjyqtarët e Gjykatës së Lartë që kanë gjykuar dosjen dhe nuk kanë pranuar rekursin janë Ilir Panda, Albana Boksi, Sokol Binaj.
Rigjykimi ndaj ish-ministrit lidhet me tragjedinë e Gërdecit ku nga shpërthimi në punishten e demontimit të armëve mbetën të vdekur 26 persona dhe u plagosën mbi 260 të tjerë. Rihapja e çështjes nga SPAK u bë me kërkesë të familjarëve të viktimave të shpërthimit në Gërdec.
Në muajin Mars, SPAK kërkoi rihapjen e çështjes për Mediun pasi kallëzimit të familjarëve të një 6-vjeçari i cili humbi jetën gjatë shpërthimit. SPAK argumentoi se tanimë Mediu nuk ka imunitet, sikurse kur ndodhi ngjarja dhe mund të hetohet. Megjithatë, kërkesa e prokurorisë u rrëzua nga Gjykata e Posaçme që argumentoi se prokuroria ka pasur të gjitha mundësitë që ta hetonte lirisht Fatmir Mediun pasi që prej 2012 ai nuk ka pasur imunitet, por nuk e bëri dhe në këto kushte vepra është parashkruar. SPAK apeloi vendimin në Apelin e Gjykatës së Posaçme, që rrëzoi vendimin e shkallës së parë dhe vendosi rigjykimin e çështjes, “duke i kthyer aktet Prokurorit të Posaçëm për të proceduar”. Mediu apeloi vendimin në Gjykatën e Lartë, që nga ana e saj e rrëzoi ankimin.
