Gjykata vendosi shtyrjen e seancës për Saimir Tahirin në 5 Janar.
Ish-ministri nuk dha asnjë koment për mediat.
***
Tahiri mbërrin në gjykatë, sot seanca e parë në Apel për ish-ministrin
Ish-ministri i Brendshëm, Saimir Tahiri u paraqit mëngjesin e sotëm në Gjykatën e Posaçme të Apelit për të rinisur betejën me drejtësinë.
Gjykata e Posaçme e Apelit njoftoi javën e kaluar se është plotësuar treshja e gjyqtarëve që do të rigjykojnë ish-ministrin e Brendshëm, Saimir Tahiri dhe ish-drjetuesin e Policisë së Vlorës, Jaeld Çela.
Seanca e parë është caktuar për t’u zhvilluar më 20 dhjetor – ditën e sotme, ndërsa është njoftuar se Irgerta Hysi është gjyqtarja e tretë që i bashkohet dy gjyqtarëve të caktuar më parë për çështjen, Daniela Shirka dhe Engert Pëllumbi. Vakanca u krijua pasi Ilirjana Olldashi kishte dhënë dorëheqjen.
Kur vendosi të rikthejë edhe njëherë për gjykim në Apel çështjen e ish-ministrit të Brendshëm, Gjykata e Lartë vendosi që këtë herë çështjen ta drejtojë një tjetër trupë gjykuese, duke miratuar kërkesën e avokatit të Tahirit, Maksim Haxhia.
Gjatë dëgjimit të pretendimit të palëve në seancë, SPAK kërkoi lënien në fuqi të vendimit të Apelit, që nga ana e tij kishte vendosur për kthim të çështjes në gjykim në Shkallë të Parë.
Rekurs për çështjen ka bërë edhe prokuroria, e cila i qëndron kërkesës për dënimin e Tahirit me 12 vite burg për “trafik narkotikësh” dhe “grup të strukturuar kriminal”. Sipas prokurorisë, Tahiri dhe i bashkëpandehuri i tij, Jaeld Çela, kanë garantuar grupin e “Habilajve” në trafikun e sasive të mëdha të kanabisit nga Shqipëria në Itali.
Përballja e Tahirit me drejtësinë nisi në nëntor 2017, kur ai u dyshua si garantor i grupit të “Habilajve” në trafikun e drogës. Shkalla e Parë e Krimeve të Rënda, rrëzoi akuzat për trafik droge e grup kriminal dhe e fajësoi ish-ministrin për “shpërdorim të detyrës”. Apeli i Posaçëm e vlerësoi si të gabuar rikualifikimin e veprës penale për ish-ministrin dhe ktheu dosjen për rigjykim në Shkallën e Parë.
