Në 16 korrik 2017, ka ndodhur një aksident në Maqedoninë e Veriut, ku në automjetin e përfshirë udhëtonin Arben Ahmetaj, në atë kohë ministër i Financave, dhe Mirel Mërtiri, një prej personave për të cilin janë ngritur akuza publike lidhur me aferën e inceneratorëve.
Madje edhe Komisioni hetimor Parlamentar për këtë aferë, një nga kërkesat më interesante që i ka drejtuar Ministrisë së Drejtësisë, është ajo që zbulon lidhjet e afërta direkte të Arben Ahmetajt me Mirel Mërtirin, njërin nga përfituesit e incineratorëve.
Bëhet fjalë per dosjen e drejtësisë maqedonase, e cila zbardh aksidentin e ndodhur në 16 Korrik 2017, ku ngelën të plagosur Arben Ahmetaj dhe Mirel Mërtiri.
Komisioni hetimor i kërkon Ministrisë së Drejtësisë “që t’i drejtohet autoriteteve gjyqësore të drejtësisë të Republikës së Maqedonisë së Veriut për ndihmë juridike lidhur me aksidentin e datës 16.07.2017, pranë qytetit të Kumanovës, ku u përfshi ish-ministri i Financave Arben Ahmetaj dhe shtetasi shqiptar Mirel Mërtiri.
Ndihma juridike e kërkuar konsiston në vënien në dispozicion të dosjes së plotë hetimore dhe gjyqësore që disponojnë autoritetet maqedonase lidhur me këtë çështje.”- thuhet në kërkesën për Ministrinë e Drejtësisë.
Video e mëposhtme tregon një nga momentet, kur në emisionin Opinion, Ahmetaj pyetet nga moderatori Blendi Fevziu lidhur me aksidentin, ndërsa ai i dredhon një përgjigjeje direkte, duke mos e mohuar faktin se ndodhej me Mërtirin në automjetin e aksidentuar.
