Ish-Kryeministri Sali Berisha po merr pjesë në një aktivitet të organizuar në Qytetin Studenti, atje ku 31 vjet më parë nisi lëvizja studentore që çoi në përmbysjen e komunizmit.
I shoqëruar nga deputeti Belind Këlliçi dhe Edi Paloka, kreu i Këshillit Kombëtar të PD, si dhe në praninë e familjes Hajdari, ish-Kryeministri dhe të pranishmit bënë homazhe dhe vendosën kurora në bustin e heroit të demokracisë Azem Hajdari.
Duke iu drejtuar të pranishmëve, mes të cilëve shumë prej protagonistëve të Dhjetor ´90, Berisha tha se rinia studentore e Tiranës, e udhëhequr nga djali zemërluan Azem Hajdari, ndau historinë, ndau epokat, shkallmoi dyert e mbyllura të lirisë për Shqipërinë dhe shqiptarët. Ish-Kryeministri tha se jemi mbledhur në këtë shesh ku filloi revolucioni paqësor më i madh në historinë e kombit shqiptar, i cili solli vendosjen e pluralizmit politik dhe përmbysjen e diktaturës më moniste të Europës.
“Në këtë kontekst, ata që nisën këtë revolucion, Azem Hajdari që i priu atij me guxim të jashtëzakonshëm, firmosën në historinë e kombit një nga faqet më të ndritura të historisë së tij”, tha Berisha. Sipas tij, lëvizja e Dhjetor ´90 ishte lëvizja e mijëra shqiptarë që kishin sakrifikuar jetën e tyre, rininë e tyre.
