Kremlini thotë se lideri rus, Vladimir Putin i ka paraqitur presidentit amerikan, Joe Biden një kërkesë në formë garancie ligjërisht të detyrueshme që do të përjashtonin zgjerimin e NATO-s.
Gjatë dy orësh diskutimesh me Bidenin në një video-telefonatë, Putin tha se NATO po forcon aftësitë e saj ushtarake pranë kufijve të Rusisë dhe “po bën përpjekje të rrezikshme për të pushtuar territorin ukrainas”.
“Prandaj, Rusia është seriozisht e interesuar në marrjen e garancive të besueshme, të fiksuara ligjërisht që përjashtojnë zgjerimin e NATO-s drejt lindjes dhe vendosjen e sistemeve të armëve sulmuese në shtetet fqinje me Rusinë”, thuhet në deklaratën e Kremlinit
Autoritetet ruse kanë thënë se lidhjet në rritje të NATO-s me Ukrainën dhe mundësia që aleanca të vendosë raketa me shënjestër Rusinë janë “vija të kuqe” që nuk do të lejohen të kalojnë, raporton cnn.
Putin gjithashtu i tha homologut të tij amerikan se donte garanci që sistemet sulmuese nuk do të vendoseshin në vendet afër Rusisë, tha Kremlini.
Ai tha se Putini paraqiti kërkesat e Rusisë në përgjigje të kërcënimit të Bidenit për sanksione kundër Moskës nëse tensionet aktuale mbi Ukrainën përshkallëzoheshin.
“Të dy liderët ranë dakord të detyronin përfaqësuesit e tyre të angazhoheshin në “konsultime thelbësore për këto çështje të ndjeshme”, njoftoi Kremlini.
Bisedimet u mbajtën ndërsa Perëndimi shprehu shqetësimet se Rusia do të pushtonte Ukrainën dhe paralajmëroi për “masa të forta ekonomike dhe masa të tjera” si ndëshkim nëse Moska fillon një konflikt ushtarak.
Rusia gjithashtu ka vënë në pikëpyetje synimet e Ukrainës dhe tha se kërkon garanci që zyrtarët në Kiev nuk do të përdorin forcën për të provuar të rimarrë territorin e humbur në vitin 2014 nga separatistët e mbështetur nga Rusia, një skenar që Ukraina e ka përjashtuar.
