Virologu, Arban Domi, teksa flet për transmetueshmërinë dhe simptomat klinike të variantit të ri të koronavirusit, Omicron, pohon se dy dozat e vaksinës kundër Covid-19 janë të mjaftueshme për personat e shëndetshëm dhe se vetë ai nuk e ka në plan të bëj dozën e tretë.
Në një intervistë për Ora News, mjeku virolog thotë se mutacionet e reja do ta ulin efikasitetin ndaj virusit, duke theksuar se do ulet efikasiteti në lidhje me infektimin, dhe jo në lidhje me mbrojtjen nga simptoma të rënda klinike.
Shumë qytetarë janë skeptikë për dozën e tretë, sa e nevojshme është kjo dozë?
Arban Domi: Ka 2 mendime në SHBA një pjesë e mendojnë se është e nevojshme, një pjesë tjetër ku bëj pjesë dhe unë mendojnë se nuk është e nevojshme për popullatën e shëndetshme. Është e rëndësishme për individët me sëmundje shoqëruese, moshat e thyera mbi 65 vjeç këshillohen ta bëjnë dozën e tretë. Ndërsa për individët e shëndetshëm nuk e shoh shumë të nevojshme, të paktën për momentin, për një arsye shumë të thjeshtë. Duhet të pyesin çfarë bën doza e tretë. Doza e tretë do rrisë nivelin total të antitrupave dhe për pasojë do rrisë dhe trupat neutralizues, duke ndihmuar në efikasitetin e vaksinën ndaj infektimit. Domethënë do uli pak sa infektimet. Por dy dozat për mendimin tim janë më se të mjaftueshme për të kontrolluar nivelin klinik të të infektuarve. Domethënë do ta kalojnë me simptoma të lehta, ose të mesme. Dihet që vaksinat aktuale kanë efikasitet shumë të pranueshëm për të paktën 4 deri 6 muajt e parë pas vaksinimit dhe nuk shoh asnjë arsye që dhe doza e tretë të jetë se të tjerat, që pas disa muajsh të ulet sërish efikasiteti.
Sa i rrezikshëm është ky variant i ri dhe a ka ndryshim nga variantete e tjera?
Arban Domi: Të dhënat janë jo të plota. Ka 3 elementë që po ndiqen në mënyrë të kujdesshme, së pari transmetueshmëria, së dyti efikasiteti dhe së treti çështja e simptomave klinike.
Për transmetueshmërinë duhen dhe 2 javë për të pasur një ide më ta qartë. Por mendohet për momentin se ka transmetueshmëri të lartë, por nuk dihet nëse është në nivelin e Deltës apo më shumë se Delta. Në Europë numrat janë të ulët për të bërë një vlerësim 75% e rasteve të reja në Afrikën Jugore janë të variantin e ri. Duhet të presim se si do shkojnë rastet me Omicron. Minimumi vaksina do ketë efikasitet më të ulët se sa ndaj Deltës.
Ndërkohë që po fillojmë ta shohim nga ana praktike, në Angli megjithëse numrat janë të ulët me Omicron të paktën gjysma e individëve me variantin e ri kanë qenë të vaksinuar me 2 doza. Në Amerikë ndodh e njëjta gjë, më shumë se gjysma e të infektuarve me Covid kanë qenë të vaksinuar me dy doza. Kjo tregon se vaksinat relativisht do ta ulin efikasitetin ndaj këtij virusi, por dua ta thkesoj efikasitetin në lidhje me infektimin, jo në lidhje me mbrojtjen nga simptoma të rënda klinike.
Besoj se do të konfirmohet se efikasiteti i vaksinave do të jetë goxha më i ulët për sa i përket infektimit.
Në të gjitha rastet pavarësisht me dy doza ose me një dozë të infektuarit me Omicron, kanë qenë me simptoma të lehta, nga rastet në Amerikë. Për momentin duket të jenë simptoma klonike të lehta mesatare, jo shqetësuese.
