Prishja e pazareve të drogës është pista kryesore e hetimit të policisë së Vlorës për ekzekutimin e 32-vjeçarit Refit Toro. Viktima, i cili ka ndryshuar emrin nga Jetnor në Refit, është person me precedent dhe rekorde të theksuara kriminale.
Ai rezulton i skeduar nga policia shqiptare dhe ajo italiane. Kohët e fundit viktima ishte kthyer nga Italia, ku në vitin 2004 ishte dënuar me rreth 5 vite burg së bashku me një tjetër shqiptar. Ai ishte pjesë e një organizate grabitësish. Më pas dyshohet se ishte përfshirë në trafikun e drogës.
Dëshmitarët në vendngjarje i thanë policisë se pak momente para vrasjes Refit Toro ishte parë të qarkullonte me makinën e tij “Mitsubishi” dhe fliste në telefon për një kohë të gjatë. Më pas u qëllua me breshëri kallashnikovi nga një person, i cili më pas u arratis me këmbë dhe dyshohet se e priste një makinë.
Grupi hetimor do të analizojë tabulatet telefonike të viktimës për të zbuluar personin apo personat me të cilët komunikoi para vrasjes, shkruan syri.net.
