Presidenti Ilir Meta ishte sot në Vlorë, ku mori pjesë në ceremoninë e ngritjes së Flamurit me rastin e 109 vjetorit të Pavarësisë.
Në ceremoninë e organizuar, gjithashtu ishte i pranishëm edhe Kryeministri Edi Rama dhe Kryeparlamentarja Lindita Nikolli, ndërsa tërhoqi vëmendje fakti se u shmang çdo lloj kontakti mes Kreut të Shtetit dhe Kreut të Qeverisë.
Ndërkohë në një postim në rrjetet sociale, Meta shkruan “në Vlorën e lavdishme të Pavarësisë u përula sot me nderimin dhe respektin më të thellë para themeluesit të shtetit tonë modern dhe Atit të Shqipërisë, Ismail Qemalit, kujtimit dhe veprës së ndritur të Tij dhe të shumë patriotëve të tjerë, që realizuan 28 Nëntorin e vitit 1912!”
“Të mbrojmë dhe të lartësojmë simbolet tona kombëtare dhe të mos humbasim më kohë për përmbushjen e ëndrrës për një Shqipëri plotësisht europiane sepse 109 vite janë mëse të mjaftueshëm për të dëshmuar pjekurinë dhe seriozitetin e një shteti modern.
Urime 28 Nëntorin e Gjergj Kastrioti Skënderbeut dhe Ismail Qemalit, të Isa Boletinit dhe Adem Jasharit!”, shkruan Meta.
