Kryetarja e Lidhjes Demokratike të Gruas, Albana Vokshi tha nga Shkodra se Kuvendi kombëtar i Partisë Demokratike do të mbahet më 11 Dhjetor.
Deputetja demokrate u shpreh në një prononcim për gazetarët se tanimë fjalën e ka anëtarësia, pasi janë rreth 5 mijë firma të mbledhura për mbajtjen e Kuvendit më 11 Dhjetor.
“Anëtarësia është parti. Një kryetar pa anëtarësi nuk është më kryetar. Më datën 11 do të jetë kuvendi historik i PD-së. Do të merren vendime historike për rithemelimin, ringritjen, dhe mundësimin e PD-së një forcë të vërtetë opozitare për të rrëzuar regjimin e Edi Ramës”, tha Vokshi.
Duke iu përgjigjur interesimit të gazetarëve lidhur me mundësinë e përjashtimit nga partia në rast mosbindjes së urdhrave të Lulzim Bashës, Vokshi u shpreh: “Unë jam me anëtarësinë. Jam me partinë e vërtetë Demokratike. Nuk ka kush më përjashton nga PD”.
Për “Foltoret”, Vokshi tha se, janë tashmë një hapësirë shumë e madhe për çdo demokrat apo jo demokrat për të thënë mendimin e tij. “Mendim që ne deputetë apo anëtarë kryesi s’mund ta themi pa u marrë masa nga forumet drejtuese të partisë demokratike”, shtoi.
Vokshi ishte e pranishme në një takim me gratë dhe vajzat në qytetin verior, në kuadër të një takimi sensibilizues nga Lidhja Demokratike e Gruas Shkodër. Në fokus të takimit ishte dhuna në familje. Deputetja foli me nota shqetësuese për rastet në rritje, pranoi dështimin e amendamentit që miratuan 3 vite më pare.
