Një godinë e katit të parë në Qendrën Universitare Spitalore u përfshi nga flakët këtë të Shtunë.
Godia ku ra zjarri është një nga zyrat e administratës në repartin e ish-kirurgjisë, që më pas u përdor si pavijon për të mjekuar të prekurit nga koronavirusi – spitali Covid 3. Nga flakët, nuk raportohet për persona të lënduar.
“Te spitali ‘Covid 3’ ka rënë zjarr në një nga zyrat e administratës, ku ka vetëm dëme materiale. Shërbimet zjarrfikëse kanë bërë të mundur fikjen e zjarrit. Grupi Hetimor është në vendngjarje dhe po punon për sqarimin e rrethanave të rënies së zjarrit”, njoftoi policia.
Ministrja e Shëndetësisë Ogerta Manastirliu tha në një deklaratë për gazetarët nga spitali QSUT se zjarri ra në një dhomë ku nuk ofrohej shërbim për pacientët dhe nuk ka asnjë person që ka shfaqur probleme.
“Ky incident sapo është evidentuar nga struktura mbështetëse, është reaguar përmes bombolave fikëse dhe janë lajmëruar strukturat përgjegjëse që po kryejnë investigimin e mëtejshëm. Të gjithë pacientët, stafi mjekësor, stafi i shërbimeve mbështetëse janë shumë mirë. Incidenti ka ndodhur në këtë zonë të strukturës së ish-kirirgjive ku nuk ofrohej shërbim. Janë mbi 70 pacientë në spitalin Covid 3, por s’është prekur asnjë prej 3 pavijoneve. Në një prej dhomave ka pasur një incident, është vepruar në kohë. Situata është nën kontroll. S’mund t’ju flas për shkaqet janë disa pista që po vlerësohen, presim ekspertizën”, tha ministrja.
