Dështak dhe varrmihës të shpresës së shqiptarëve, e ka cilësuar ish-Kryeministri Sali Berisha, kreun demokrat Lulzim Basha.
Nga Foltorja e Burrelit, Berisha tha se Lulzim Basha u shndërrua në një aleat i pashpallur i narko-shtetit. Berisha tha se të gjitha problemet që janv krijuar në PD vijnë nga mungesa e votës.
“Nga viti 2009 deri më sot, Partia Socialiste nuk njeh votë. Emërohen ministra pa ditur asgjë, pa i njoftuar askush më parë. Edi Rama zhduku votën në parti dhe në shoqëri. Në 2021 Edi Rama përdori si kurrë më parë paratë e thesarit nga Buxheti i Shtetit, ku vetëm në 2 muaj shpërndau 130 mln euro, përdori patronazhistët dhe bandat që ushtruan terror. Po ku ishim ne?
Pasi Rama rrëmbeu votat, peng-Kryetari në vend që të mbushnim sheshet dhe të protestonin, u morr me karrigen e vet. Lulzim Basha i ke borxh demokratëve të Shqipërisë.
Lulzim Basha shkelmoi mbi votën, procesi i zgjedhjes ishte plotësisht i manipuluar. Na zgjodhi një Kryesi pa votë. Peng Basha që imiton Ramën, spastroi partinë dhe e çoi drejt organizimeve komuniste”, tha Berisha.
Ish-Kryeministri i ka drejtuar një thirrje anëtarëve të Kryesisë që të dorëhiqen dhe të bashkohen me Kuvendin e 11 dhjetorit, si të vetmin Kuvend që do të bashkojë demokratët.
“Vetëm vota mund të na bashkojë, asgjë tjetër. Jepni dorëheqjen menjëherë, mos rrini pengje të peng Bashës se do të bëni një gabim të rëndë për veten tuaj”, tha Berisha.
