Një 40-vjeçar ka rënë në prangat e policisë pasi në aksin nacional Kakavijë-Gjirokastër, në vendin e quajtur “Ura e Lumit”, u kap duke transportuar me makinën tip “Volkswagen”, 3 emigrantë të paligjshëm.
Ai ishte dënuar më parë për veprën penale “Vjedhja me dhunë” e kryer në bashkëpunim.
“Specialistët për Hetimin e Trafiqeve të Paligjshme, në bashkëpunim me Seksionin Operacional në DVP Gjirokastër, në vijim të operacionit ‘Muzgu’, për goditjen e aktivitetit kriminal të dhënies ndihmë të shtetasve të huaj për kalim të paligjshëm të kufirit, kundrejt shpërblimit, në bazë të informacioneve policore, kanë goditur një tjetër rast, si rezultat i të cilit u bë arrestimi në flagrancë i shtetasit S. D., 40 vjeç, banues në Durrës (i dënuar më parë për veprën penale ‘Vjedhja me dhunë’ e kryer në bashkëpunim). Arrestimi i këtij shtetasi u bë pasi në aksin nacional Kakavijë-Gjirokastër, në vendin e quajtur ‘Ura e Lumit’, është kapur në flagrancë duke transportuar me një automjet ‘Volkswagen’ që e drejtonte pa leje drejtimi, 3 emigrantë të paligjshëm, në drejtim të Tiranës, kundrejt shumës 300 euro për person. Gjithashtu u shpall në kërkim shtetasi S. Z., 23 vjeç, banues në Durrës, i cili nuk iu bind urdhrit të punonjësit të Policisë për të ndaluar. Gjatë kontrollit personal, shtetasit S. D. i është gjetur një mjet i mprehtë (thikë). Në cilësinë e provës materiale u sekuestruan automjeti, një aparat celular dhe mjeti i mprehë (thikë)”, njoftoi policia.
Materialet në ngarkim të shtetasve të mësipërm i kaluan Prokurorisë pranë Gjykatës së Shkallës së Parë Gjirokastër, për veprime të mëtejshme, shtuan të njëjtat burime.
