Lyda Yolanda Harris, e arrestuar në vendin tonë më herët vitit për llogari të autoriteteve amerikane, është ekstraduar drejt SHBA-ve.
“Interpol Tirana në bashkëpunim me zyrën e ARSO-I pranë Ambasadës Amerikane në Tiranë kryen ekstradimin e shtetases Lyda Yolanda Harris drejt Shteteve të Bashkuara të Amerikës dhe ju dorëzua Marshall-ëve Amerikanë. Arrestimi i saj u krye në vendin tonë në muajin gusht 2021, nga njësia policore speciale ‘Joint Shield’, në bashkëpunim me Interpol Tiranën, me qëllim ekstradimi për në SHBA. Ky subjekt ishte shpallur në kërkim nga autoritetet amerikane, pasi Gjykata e Distriktit Jugor të Kalifornisë, ka lëshuar urdhër arrestin ndërkombëtar të datës 28.07.2021, për kryerjen e veprës penale ‘Komplot për kryerjen ose pjesëmarrjen në një organizatë përmes aktivitetit shantazhues’”, njoftoi policia këtë të Diel.
Disa ditë më parë, gjykata e Tiranës vendosi ekstradimin e amerikano-kanadezes 74-vjeçare, me kërkesë të kësaj të fundit.
Harris u arrestua në fillim të Gushtit në vendin tonë, para se të largohej në drejtim të Gjermanisë.
Sipas hetimeve, ajo ka mbledhur fonde me pretendimin për të ndihmuar një person që kishte probleme shëndetësore dhe kishte nevojë për ndërhyrje kirurgjikale. Sipas autoriteteve amerikane, ajo ka mbledhur një shumë të konsiderueshme parash e më pas është larguar duke i përvetësuar ato. Nga hetimet, ka rezultuar që kjo ka qenë një skemë mashtrimi pasi nuk ka pasur asnjë person të sëmurë që ka pasur nevojë për ndihmë.
