Erigers Mihasi 32 vjeç dhe Armando Dumani, 26 vjeç, janë viktimat nga atentati që ndodhi në zonën e Astirit në Tiranë.
Dy viktimat po qarkullonin me një automjet Audi A8, kur ndaj tyre u qëllua me breshëri automatike, nga një tjetër automjet. Mësohet se dy të rinjtë janë qëlluar me breshëri kallashnikovi, edhe pse nga raportimet mësohet se nuk janë dëgjuar të shtënat. Në automjetin e viktimave ka të paktën 15 gjurmë plumbash, 9 prej të cilave janë në një prej dyerve.
Referuar burimeve nga vendi i ngjarjes, ndaj automjetit që qarkullonin viktimat është qëlluar në xhamin e parë të automjetit, por edhe në xhamin anësor në anën e shoferit.
Policia ka ngritur disa postoblloqe në pikat hyrëse dhe dalëse të Tiranës. Gjithsesi raportohet se në Thumanë është gjetur një automjet i djegur, që ndoshta është përdorur nga autorët në këtë krim.
Por ka dyshime se ndoshta automjeti tip Honda, që është gjetur i djegur, mund të jetë djegur për të tërhequr vëmendjen nga ngjarja dhe autorët mund të jenë larguar në një tjetër drejtim.
Policia është treguar shumë e rezervuar lidhur me ngjarjen, ndëtrsa trupat e viktimave janë larguar nga vendi i ngjarjes rreth 90 minuta pas atentatit.
