Ashtu sikundër ka ndodhur në të gjitha atentatet e kryera së fundmi, autorët, pas largimit nga vendi i ngjarjes djegin automjetet me të cilat kryejnë atentatet duke u munduar të fshehin çdo gjurmë krimi.
Edhe këtë mbrëmje, pas atentatit që iu bë në zonën e Astir, Erigers Mihasit dhe Armando Dumanit, pak minuta më vonë, policia ka konfirmuar se ka gjetur në zonën e Thumanës një automjet të djegur.
Dyshohet se kemi të bëjmë me automjetin që mendohet se u përdor nga atentatorët në këtë krim të rëndë.
Por ende nuk kemi asnjë të dhënë nga policia se kush mund të kenë qenë autorët e dyshuar të kësaj ngjarje dhe nëse makina tip Honda e gjetur e djegur, është ajo që u përdor në ngjarje.
Por duhet të theksojmë dhe një fakt, se edhe në këtë rast kemi të bëjmë me një person që pas arrestimit për një grabitje, është lënë i lirë nga gjykata. Erigers Mihasi ishte person me precedent penal, dhe në momentin e arrestimit, Mihasit i janë gjetur një sasi armatimi.
Nuk dihet nëse ky atentat ka lidhje me përfshirjen e Mihasit në grabitjen e prindërve të Elton Çiços.
